लिस्वन। पोर्चुगलका लागी नेपाली राजदुत प्रकाशमणी पौडेलले आज राष्ट्रपति समक्ष ओहदाको प्रमाणपत्र बुझाएका छन् । आज राजधानी लिस्वनमा आयोजीत एक औपचारिक समारोहका बिच राजदुत पौडेलले राष्ट्रपति मार्सेला नुनो दुओर्टे रेबेलो डी सुसालाई आफ्नो ओहदाको प्रमाणपत्र बुझाएका हुन् ।
समारोहमा राष्ट्रपति डी सूसाले राजदूत पौडेललाई स्वागत गर्दै नेपाल र पोर्चुगलको सम्बन्ध अझै सुदृढ र प्रभावकारी रूपमा अघि बढ्ने विश्वास व्यक्त गरे। उनले दुई देशबीचको मैत्रीपूर्ण सम्बन्ध, सांस्कृतिक आदानप्रदान र द्विपक्षीय सहकार्यलाई थप प्रवर्द्धन गर्न तत्पर रहेको बताए । राष्ट्रपति डी सुसाले नेपालीहरुको मेहनत र मिलनसार स्वभावको प्रशंसा गर्दै भाषागत समस्या सुघारमा जोड दिएका थिए ।
सो अवसरमा राजदूत पौडेलले नेपाल र पोर्चुगलको सम्बन्ध ऐतिहासिक रहेको उल्लेख गर्दै सहकार्यलाई आपसी हितमा केन्द्रित रहने बताएका थिए । पौडेलले पोर्चुगलस्थित नेपाली आप्रवासी समुदायका विभिन्न समस्या र चुनौतीहरूप्रति आफू विशेष सचेत रहेको स्पष्ट पार्दै उनीहरुले भोग्नुपरेका वैधानिक प्रक्रिया, रोजगारी, आवास, सामाजिक सुरक्षाजस्ता विषयमा कूटनीतिक पहलमार्फत समाधान खोज्न प्रतिवद्व रहेको बताए।
हाल पोर्चुगलमा करिब साठी हजार भन्दा बढी नेपाली आप्रवासी रहेको अनुमान छ। नेपालीहरूले भाषा, कानूनी प्रक्रिया, र कागजातसम्वन्धि विविध समस्या भोगिरहेका छन्।
नेपाल र पोर्चुगलबीच सन् १९७६ मा कूटनीतिक सम्वन्ध स्थापना भएको हो। त्यसयता, दुवै मुलुकबीच आपसी सम्मान र समझदारीमा आधारित सम्बन्ध रहँदै आएको छ।
